1Uyle sıcağında, İbraim çadırnıñ qapusı ögünde, Mamre degen emen ormanı yanında oturğanda, RABBİ oña peyda oldı.2İbraim baqıp, ögünde üç yolcu turğanlarını kördi. O, olarnıñ qarşılarına atılıp turıp, secdege qapandı ve:
3– Efendim, eger men ürmetiñe malik olğan olsam, ögümden keçme.4Sizge ayaq yuvmağa suv ketirirler. Terek tübüne oturıp raatlanıñız. 5Men ise Sizge qapınmaq içün ötmek ketiririm. Soñ ketersiñiz, episi bir ögümden, quluñıznıñ ögünden keçesiñiz, – dedi.
– Yahşı, – dediler olar, – öyle de yap.
6İbraim çadırğa çapıp kirdi ve Sarege:
– Tez-tez üç ölçü eñ yahşı undan al da, hamır basıp, pite pişir, – dedi.
7Soñ İbraim sürü tarafqa çapıp ketti, yaş, yahşı baqılğan buzavçıqnı alıp, quluna berdi. Qulu ise onı tez-tez azırlamağa aşıqtı.8İbraim musafirlerniñ öglerine özü qaymaq, süt, pişken buzav etini qoydı da, terek tübünde turıp, olarnıñ aşağanlarını bekledi.
9Olar İbraimden:
– Qadınıñ Sare qaydadır? – dep soradılar.
– Mında, çadırda, – dep cevap qaytardı İbraim.
10Olardan biri dedi ki:
– Kelecek yılı tamam bu vaqıt Men kene saña kelirim. O vaqıt Sarede endi oğlan bala doğacaq.
Sare ise onıñ arqasında, çadırnıñ qapusı artında, diñlep tura edi.11Olar ekisi de: em Sare, em İbraim endi bayağı yaşta qart adamlar ediler, ve adetince qadınlarda olğan şey Sarede toqtalğan edi.12Sare içinden külip:
– Mañamı, qartayğanımda, bu quvançqa saip olmaq? Efendim de endi qart, – dep tüşündi.
13RABBİ İbraimge:
– Sareniñ: "Maña, qart qadınğa, bala tapmaqmı?" – dep külgeni nedir?14RABBİ içün qıyın ve yapıp olamaycaq şey barmı? Kelecek yılı, kesilgen künü saña Men kelirim, ve o zaman Sarede endi oğlan bala olur, – dedi.
15– Men külmedim, – dep yalan ayttı qorqqan Sare.
– Yoq, – dedi oña RABBİ, – sen küldiñ.
No comments:
Post a Comment