Sodom şeeriniñ günası-Tora-Bereşit-Başlanuv

Sodom şeeriniñ günası
     1     Eki Melek Sodomğa aqşam keldiler. Lut Sodom şeeriniñ araba qapuları ögünde otura edi. Lut olarnı körip, olarnı qarşılamaq içün yerinden turdı ve bel bükip:
     2– Efendilerim, diñleseñiz! Quluñıznıñ evine kiriñiz ve anda geceleñiz, ayaqlarıñıznı da yuvarsıñız. Saba erte turıp ise, yoluñıznı devam ettirirsiñiz, – dedi.
     Lâkin olar:
     – Yoq, biz meydanda gecelermiz, – dediler.
     3Lut ise olarğa pek yalvarğan soñ, olar oña taraf yol alıp, onıñ evine kirdiler. Lut olarğa sofra qoydı ve mayasız pite pişirdi. Olar aşadılar.4Olar yatmazdan evel, şeer aqayları, Sodom aqayları – yaşı-qartı, episi çetlerden kelgen bütün halq – evniñ etraflarını sarıp aldılar.5Olar Lutnı çağırıp, oña:
     – Saña gecelemege kelgen aqaylar qana? Olarnı bizge çıqar, biz olarnıñ namusına toqunayıq, – dedi.
     6Lut bosağağa çıqtı ve artından qapunı qapatıp,7olarğa:
     – Qardaşlarım, yamanlıq etmeseñiz!

8Mına, aqay körmegen eki qızım bar. Men olarnı sizge çıqarayım da, olarnen istegeniñizni yapıñız. Lâkin bu adamlarğa bir şey etmeñiz, çünki olar menim evime keldiler, – dedi.
     9– Ket mından, – dediler olar. Bir-birine ise dediler: "O, kelmeşek, mında vaqtınca yaşamaq içün keldi; o, bizni mahkeme etmege isteymi?" – Endi biz saña olardan daa beter şeyler yaparmız.
     Soñ olar Lutnı sıqıp başladılar ve, qapunı urıp çıqarayıq dep, yaqınlaştılar.10O zaman o Aqaylar qollarını uzatıp, Lutnı içerige, evge kirsettiler ve qapunı qapattılar.11Evniñ qapusı yanında olğan aqaylarnıñ, yaşı-qartınıñ közlerini ise kör ettiler, ve qapunı qıdırıp olarnıñ esleri ketti.12İçerideki aqaylar ise Lutqa:
     – Seniñ daa kimiñ bar mında? Kiyevleriñmi, oğullarıñmı, qızlarıñmı, şeerde kimiñ olsa, episini bu yerden alıp ket.13Biz bu yerni yoq etecekmiz, çünki RABBİge köterilgen şu şeerniñ sakinlerine qarşı olğan qıyamet quvetlendi, ve RABBİ onı yoq etmek içün bizni yolladı, – dediler.
     14Soñ Lut çıqıp, onıñ qızlarına nişanlanğan kiyevlerine böyle dedi:
     – Tez bu yerden ketiñiz, çünki RABBİ bu şeerni yoq etecek.
     Lâkin kiyevleri, Lut şaqa ete, dep bellediler.